Mar 15 | ASO | STEP | Nedenga' go' nolivo eveneto' medeli mini O'moso inite' lehizi-daa' ave nabasi mono' gizebo vesi mono' apizi ngimaa' avesi kanisole muki' nesi ingine lovo gizi gamazi li huki Izesu'ni analo' nala' di-di ele'mizi vi Pilato' anau' milani'.

Mark 15

Izesu'ni Ele'mizi Vi Pilatodo' Goni' I-dani' Gamazi

(Mataio' 27:1-2; Luka' 23:1-5; Zohane' 18:28-38)

1 Nedenga' go' nolivo eveneto' medeli mini O'moso inite' lehizi-daa' ave nabasi mono' gizebo vesi mono' apizi ngimaa' avesi kanisole muki' nesi ingine lovo gizi gamazi li huki Izesu'ni analo' nala' di-di ele'mizi vi Pilato' anau' milani'. 2 Ne'mine ikevo Pilato' aza longo' o-do ti' lo line': Gaza nene Zuda veti guve'inesi ve naba nabe. Olo. Ne'mine lo longo' o-davo ti' lo lo-imine': Mo gasika nene nolaine' ve. 3 Lavo eveneto' medeli mini O'moso inite' lehizi-daa' ave naba nete inite' mukikumu' goni' i-dikevo 4 Pilato' ti' lo gohi longo' o-dine': Ingine ne'mine mana'mine nitekumu' goni' nogidune li inite' mukikumu' nilani' nene gele nabe. Nemu' do velepe' izo gamazi gaza ma lo-ngemeline' nomihe. 5 Ne'mine lo longo' o-dine'za Izesu' aza gamazi gohi ma do velepe' izo lamivo Pilato' aza gala muki' giline'.

Izesu' Helelive Likevo Pilato' Gele nGimine' Gamazi

(Mataio' 27:15-26; Luka' 23:13-25; Zohane' 18:39-19:16)

6 Kilisimasilo' kilisimasilo' O'moso'mo Zuda veti avotemotine ise'ine izingumu' gelo holise' minaa' une' gamenelo' gamenelo' nene Zuda ve nete galapuso ve muki' minanguti' nene hamo' ma heta vilive li gulive ikevo Pilato' aza a'mine ve nene nala' numunguti' hulo heta o-ngedaa' ine' ve. 7 Ido' ve malite ngamani lovo ngimi evene' ngibilavo galapuso numungu' huli-ngidikevo a'mine gamenelo' nene inginesi a'mingu' minani'. A'mine veuti' nene ve ma gulive Balabasi' minine'. 8 Minine' nenako evene' muki' di gese' igi Pilato' neida vi kilisimasilo' kilisimasilo' oga' ine' ma'mine ogo evene' ma hulo heta o-delive li longo' i-di minikevo 9 Pilato' aza do velepe' izo ti' lo longo' o-ngidine': Lengi' Zuda veti guvetinesi ve iseve izo hulo-delongumu' nilahe. 10 Ido' ne'mine lo longo' o-ngidine' nene evene' vai' Izesu'ni e'metani' nenako nemu' eveneto' medeli mini O'moso inite' lehizi-daa' ave naba nete ezemu' mulu'ningu' goloso gilii nemu' gonito' ele'mizi milikeni' neivo nemu' Pilato' aza ningo gelo longo' o-ngidine' ve. 11 Ti' lo line'za eveneto' medeli mini O'moso inite' lehizi-daa' ave naba nete evene' muki' ga'ine di a'mine vemu' lami Balabasi' ve lilo likevo a'mido' gili ngimi Balabasi' ve lani'. 12 Ne'mine likevo Pilato' aza gohi longo' o-ngedo ti' lo line': Zuda veti guvetinesi ve ve lave nene nadi' o-delove. 13 Ti' lo longo' o-ngedavo di velepe' izi gamazi nabauti' ti' li lani': Gaza lanivo lohoto' zalo' bili hililizave. 14 Likevo Pilato' aza ti' lo lo-ngimine': Nanitekumu' lohoto' zalo' belelone. Inite' goloso ine' nene nanite' nolive. Ti' lo lo-ngimine'za ingine amuzo mili lohoto' zalo' bele'navo li gohi geligelinga lani'. 15 Ne'mine likevo Pilato' nene eveneliti mulu'ine do hongu lo Balabasi'ni hulo heta o-davo engita vine'. Ne'mine ogo Pilato' aza lavo ngibilaa' ani' gavosodunu' Izesu'ni mehene izivi' ledivi' igi bilikevo di vi lohoto' zalo' bililizave lo Loma veti ami pilisi ve neti a'ningu' molani' ve.

Amilite Izesu'ni Golo Izani' Gamazi

(Mataio' 27:27-31; Zohane' 19:2-3)

16 A'ningu' molavo ele'mizi ngamanilo' gizebo ve nabali'mi numuno oluso' misubo vovo minido' vii ami lingela asi li-ngidikevo ikevo 17 gulehe' lavolavo guve'inesi vetevo' ngilaa' ani' ne'mine ma oko'nolo' di ngili-di uhoni nala' nene di gangi guve'inesi ve nabalitevo' madu'nido' gihaa' ani' nite' ne'mine ma apa nite' igi lili' igi gihi-di 18 api' igi geke' voke' li-dika' li-dika' igi mini Zuda veti guve'inesi ve naba ma nene gopo'ni nolo-gidune lii 19 angabadunu' godololo' bilaa' bilaa' ido' gituho' i-daa' i-daa' ido' gubi' izi imaa' imaa' igi golo izi minani'. 20 Ne'mini golo izani' nene osu' lavo lavolavo gulehe' nene apasi di huli-di ei' oko'nolo' inite've nene gohi di izi-di lohoto' zalo' bililisa ele'mizi vani'.

Izesu'ni Lohoto' Zalo' Bilani' Gamazi

(Mataio' 27:32-44; Luka' 23:26-43; Zohane' 19:17-27)

21 Ne'mine igi nivavo ve ma gulive Simoni' aza Kilene ebetoti' ve Alekisadeki Luhuki me'nibo aza Zelusalemi tauni hetati' a'mingu' dizo volosa navo votene' igi Izesu' lohoto' za'velo' nene gehe-delive li amuzonga li-dikevo geho vine'. 22 Ne'mine ogavo Izesu'ni ele'mizi vi ebe' ma gulive Goligota nene leze gamaziuti' nene godolo amuzo ebe' ve lado' nene vi heteli 23 vaini nosou' mulumo gilamaa' inite' gulive mula nene di gopo igi imani'za namine'. 24 Namivo lohoto' zalo' nilidunu' bilisa genegana've nene ize' mili dalisa do nado ize' molalone li zohi' igi geheni mulo ngomo ma hulika' hulika' ikevo ngivile' igi hulave nete dika' dika' ani'.

25 Ho' olihe amuzo nomolavo 9 kiloku ne'mido' nene zalo' bili di otani'. 26 Ne'mine ikevo goni' i-dani' lihime li soto' igi luhuvo ti' li gizikevo minine': Zuda veliti guve'inesi ve naba ve. 27 Ido' gizengize ve seta' ezesi maka' lohoto' zalo' ngibili ma ne ana zamela di oti-di ma ne ana adavala di oti-dani'. 29 Ne'mine ikevo evene' igi vigi ave nete ungumu' ungumu' izi gize' i-di ti' li lani': Oho, mono' numuno naba izo kuso gamene setohamo novivo gohi gizelove laa' anive gaza 30 gei' okonga nene do gu' izo lohoto' zaloti' nene apaso lemevo. 31 Nilavo eveneto' medeli mini O'moso inite' lehizi-daa' ave nabasi mono' apizi ngimaa' avesi a'mine'mine igi gize' i-di li volelo' melo' igi ti' li lani': Aza evene' linge ma nene do ngu' izive lani'za ei' oko'no nene ngelo do u' izamiline' ogave. 32 O'moso'mo Isilaele' ve do lu' izelive lo imiselelesa live leli' guvetesi ve naba noline' nene lohoto' zaloti' lemelive. Ne'mine ogavosa laza ningo ezemu' gele ele'vole' olone' nenako ve li lani'. Likevo lohoto' zalo' maka' ngibilave sita' nesi a'mine'mine igi gamazi goloso li-dasine'.

Izesu' Hiline' Gamazi

(Mataio' 27:45-56; Luka' 23:44-49; Zohane' 19:28-30)

33 Ido' tuvelu (12) kiloku ogavo neloti' nene ebe' mukiku' liti'muso ize gese' ogo mine do vo tili (3) kiloku nivenga' ogavo gohi labana' iline'. 34 Ido' tili kiloku ogavo Izesu' aza amuzo molo asi naba lo ti' lo line': Eloi Eloi lama sabahatani. Leze gamaziuti' ne'mi monovo nene ne'mino neive: O'mosoo, O'moso'ne make, nanitekumu' hulo-nedane. 35 Lavo eze minine' gahevela minave linge ma nete nene gili ti' li lani': Gililo. Polohete Elia'nimu' asi nolive. 36 Likevo ve mali'mo nosou' lupizisa lipi naa' ani' inite' ma do ekese' oga' ine' vaini nosou' lupizo vai' lavo viliki' viliki' lo nalive lo ngongo'nolo' izo noemo ti' lo line': Elia' lemo apase-delihe ninge minelone. 37 Lavo Izesu' asi naba lo ahu' do dizo hulo hiline'. 38 Nohilivo mono' numuno nabau' izi hukikani' lavolavo nene veletati' gala'muda limivo izo ho'lo seta' ine'. 39 Izesu' ahu' do dizo hulo nohilivo ami pilisi veliti gizebo ve'ine naba ma Izesu' velela ote minive ne'mo ningo ti' lo line': Ve mene lamineto' mo O'moso'mi gipele minani' neive.

40 Ido' vene' linge ma nene hoto' gidini mini ningi minani'. A'mine vene' muki' minangu' nene Mangadala numudoti' vene' Malia' nesi ido' ei' abalaho ado' Zoseki ido' Zakobo' ngomogi netise ize'nibo nesi ido' Salome' nesi nene maka' minani'. 41 Ingine nene Izesu' nGalilaia misubola mono minido' e'meti moni hize ele' i-di maka' minani' vene' minani'. Ido' vene' linge muki' Izesulesi Zelusalemi numuda dizi ani' vene' nesi nene maka' minani' ve.

Izesu'ni Galese Izi-dani' Gamazi

(Mataio' 27:57-61; Luka' 23:50-56; Zohane' 19:38-42)

42 Nivenga' molavo holisekumu' inite' di va'va' ani' gamene nene a'mido' geto osu' lo holise' minaa' ani' gamene nene olosa neivo nemu' nene 43 Alimataia numudoti' ve Zosehe' aza evenelite gilavo dizo minavo gili imaa' ani' kanisole mino ido' O'moso'mo eveneto' gizebo iline' gamene alingumukovo' nene gizebo ogo minaa' ive ne'mo aza ehelele izine' nene gele hulo Pilatoda vo Izesu' oko'no nene nemelive lo longo' o-dine'. 44 Longo' o-davo Pilato' aza mo Izesu' hilihe lo gala seta' gelo ami pilisi veliti gizebo ve naba asi lo-davo ogavo Izesu' mo helahe lo longo' o-dine'. 45 Longo' o-davo mo helave lavo gonoso nene Zosehe'ni do vilive lo lo huko-davo 46 aza lavolavo mokono' lamine' ma vo meni hizosa Izesu'ni nene lohoto' zaloti' apaso do lemo a'mine lavolavodunu' asabu' ize-do gonoso milaa' ani' ebe' lili' igi gehengu' golo'vatikangu' nene do vo molo-do gonoso galese velelo' nene geheni naba ma do velehe' molo do tilekine'. 47 Galeseu' nomolo-divo Mangadala numudoti' vene' Maliakisi ido' abalaho Zose' izelehosi engi' nene ningi minasine'.